الثلاثاء، 6 ديسمبر، 2011

اه يابلد اه


خايف يابلد النيل من فيضانك ليصب فى البحر
ونرجع بعد الثوره  تانى لنقطه  الصفر
الكل تايه وبيسئل تايهيين
ولاحد فاهم حاجه  وبيسئلوا ناس عامليين انهم فاهمين
ولاحد عارف ليكى طريق
والسكك مليانه بالغيوم تضل الكل عن الطريق
 امتى يرجع سماءكى رايق
لاجل اطمئن عليكى ويبقى بالى  رايق
 اه يابلد اه
عشانك بتالم  وبقول ميت اه

السبت، 12 نوفمبر، 2011

مجرد نفس



معقول هكون فى يوم كدا  
 بعد الحركه والعيشه سنين اخرنا نصبح كدا
اين صوتك يا  اللى كان صوتك  بيرن زمان
معقول انت اللى دلوقتى موجود فى المكان
معقول بعد مانعيش حياتنا بالطول وبالعرض
تكون اخرتنا خشبه مالهاش لطول ولا عرض
بعد ماكنا بنقود الناس يمين وشمال
هما اللى فى الاخر يقلبونا يمين وشمال
رحله اولها ترحاب  واخرها وداع
عجبى
 عجبى عليك يانسان  اقوى ما فيك نفس
بنقول الطبيخ نفس
اتارى الانسان كله مجرد نفس
عجبى

الأحد، 23 أكتوبر، 2011

انسان

يمكن يكون انسان
عاش حياته سرحان
فى ملكوت الله كان بيفكر
والفكر يحدفه يمين وشمال ولامره واحده رسى  على بر
وتعدى الايام وتمر
ولا مره فى حياته استقر
ساعات بيشوف نفسه  طفل وساعات عجوز
ساعات يكون بعقل طفل واحساس عجوز
وساعات يكون باحساس طفل وعقل عجوز
يهرب من زمنه  الى زمن غريب
وساعات يحب يعيش فى زمنه يلاقى زمنه غريب 
عجبى 

الأحد، 9 أكتوبر، 2011

عينى عليك ياوطن

عينى عليك ياوطن 
مكتوب عليك الحزن والشجن  
الحرب قامت ولا ايه
حد يقولى الحكايه ايه  
طب هو احنا بنحارب مين 
ومين بيضرب فى مين  
مصابين وقتلى فى جيشنا 
هو احنا مين بيحاربنا
معقول شعبنا بيضرب فى جيشنا 
وجيشنا بيضرب فى شعبنا 
  ماكنش  الدم من مطالبنا
هنقول فلول وهنقول بلطجيه
وزمان كنا بنقول  نظام وتكبر جوه النفوس القضيه
ياحسره عليك ياوطن
مكتوب عليك تعيش فى  حاله حزن و شجن
اهلك قاموا بثوره
وعدت الايام وبقى كل كلب بيبحث عن عضمه
فى جمعه استرداد الثوره منصتين  
متجاورتين على نصيتين
وكل منصه بتبحث عن قياده الميدان
والناس وسطهم تايهه فى الميدان
بتصرخ نسمع مين فيكم ياغجر
بلاش تبقوا زى البقر
صحيح احنا اتخلقنا باذنين
لكن مستحيل نقدر فى وقت واحد نسمع اثنين
منصه بيتقال انها بتاعت ائتلاف
وعلى الميكرفون  بينهم خلاف
واللى انتصر ومسك الميكرفون قال للناس مش عايزين حد يزرع بينا خلاف
 ومنصه  بيقولوا سلفيه   معموله لحمله انتخابيه 
يوصل الشيخ المترشح يهتفوا  اسلاميه
ياعم الشيخ  لسه  اوقات الانتخابات جايه
مش وقت حمله انتخابيه
وتمر الايام وحرائق تولع
مسيحين بيتظاهروا والكل بيولع
اتوبيسات تضرب بالطوب وعربيات بتولع
دا حريق القاهره القديم ولا القاهره اتعودت على التوليع
تاريخك ياوطن بيقول انك مهد الاديان
بس للاسف اهلك بيلعبوا بالاديان
ايه الحكايه  حد يقولى الحكايه ايه
الحرب قامت ولا ايه
مصابين وقتلى فى جيشنا
معقول شعبنا بيضرب فى جيشنا 
وجيشنا بيضرب فى شعبنا 
افرحى يا امريكا  وارقصى يا اسرائيل
من غير ما نتعبكم  ونعمل فى جيشكم  خساير
بنقتل  في انفسنا   وفى جيشنا  بجد انا دمى فاير 
حزين عليك ياوطن 
وفى قلبى  حزن وشجن 
قمنا  بثوره على حكامنا  الفاسدين 
بس ازاى هنصلح ولسه احنا للاسف فاسدين 
عينى عليك ياوطن 
وفى قلبى حزن وشحن
خايف عليك ياوطن من اهلك 
اللى بيسفكوا دمك 
وبتمنى يكونوا مش اهلك 
بس سؤالى اللى بسئله  دايما لو   هما مش اهلك 
طب راحوا فين اهلك 
عينى عليك ياوطن 
مكتوب عليك  الحزن والشجن 
عينى عليك ياوطن 



ربنا يرحم  ضحايا الاحداث 



الاثنين، 3 أكتوبر، 2011

انتهى


انتهى كل شئ مابينا يامن كنت اتوهم انك صديقى  
يا من نشرت على جنبات الطرق اسرارى
انتهى
يامن ناديتك فى جرحى فلم تسمعنى
يامن خداعك فى يوم  جرحنى
انتهى
لاتندهش حين تاتى عينك فى عينى ولا اراك
لاتندهش حين تنادينى فلا اسمعك
فكل حواسى ستفقد وظائفها فى وجودك
فعينى لن تراك حتى ولو كنت امامها
واذنى لن تسمعك حتى لو صرخت بداخلها
فسيكون صراخ كالهامس على بعد امتار
وستبكى على فراقى ليلا ونهار
لاتعاتبنى فانت الغدار
اسئل جنبات الطرق من فتش الاسرار
 اتريد منى  ان اصاحب من لم يصاحبنى؟!
اتريد منى ان اصاحب من كان يزيد من جرحى؟!
لا اظن انك لو كنت مكانى  تفعلها
ولااظن اننى  فى يوما  معاك سافعلها 
انتهى 

الأحد، 4 سبتمبر، 2011


بيقولوا البلد مافيهاش  شغل  
  وبيسافر اهلها علشان بيبحثوا فى بلد غيرها عن شغل
غريبه بنلاقى الصينيين  والهنود  بيلاقوا فيها شغل   وبيسافروا من بلادهم ليها عشان فيها بيلاقوا شغل
غريبه كل واحد بيلاقى   رزقه  فى  بلد غيره    سبحانه   يمكن الرزق  بيجى مع الغربه  ولا دا سر  اختلاف العمله 

قالولوا  اشتغل فى بلدك اى حاجه        زى ما انت بتسافر تشتغل فى اى حاجه
قال لهم   كفايه انى اتعلمت فى بلدى تعليم اى حاجه واتخرجت منها من كليه اى حاجه
كفايه مش عايز احس انى فى بلدى ولا حاجه   
 لانى لو هحس فى الغربه  بالغربه  ماينفعش احس فى بلدى بالغربه

الأحد، 17 يوليو، 2011

زمن قله الادب


سبونا وقالوا هزار
ولما سبناهم قالوا قله ادب
طب ليه ماكله هزار فى هزار
ولا من الادب انى اكون مؤدب وانت قليل الادب
قالوا احنا كبار وانتم صغار 
عينى عليك يازمن يامكبر السفله وقلالات الادب
قالوا انتم زى اولادنا
قلنا وانتم زى ابائنا
ومنين بجيب الادب ابن قليل الادب
عجبى على الوهم اللى جاعلك يا قليل الادب 
تفتكر ان ابنك هيشم ريحه الادب
عجبى
عجبى لما تبقى الالفه انك تقولى اهلا ياجحش
 وارد عليك اهلا ياحمار
ياترى احنا مش بشر ولا فينا  حد انسان
ولا دا  من  طوله اللسان 
عجبى
عجبى لما الاباحه    تبقى  علنيه
فى المدارس  فى الشوارع فى البيوت كل حاجه  علنيه 
 يشب الصبى يسئلوه  عرفت كام صبيه
وشاهد كام فيلم من الافلام الجنسيه 
عجبى عليك يازمن  لما تبقى الاخلاق والقيم  فيك  حاجه غريبه
و  الاباحه فيك حاجه عاديه
عجبى

الأحد، 15 مايو، 2011

الانسان مخير ولا مسير

حياتى  مش حر فيها
ولا انا حر فيها
سؤال ياما اتسئل و ياما حير
الانسان مسير ولا  مخير
 الانسان باراده اختار سكته  ورسم  ملامح  حياته ودنيته
لكن ساعات يواجه عقبات ما اخترهاش  فى حياته ودنيته
يمكن تغير حياته وسكته
بس ياترى العقبات هى اللى غيرت سكته
ولا باراده هو اللى غير سكته
يدارى اسبابه  بعد ما فكر فى  البدائل  ويقول ماكنش بايدى الاختيار
طب مين اللى كان صاحب القرار
في ناس تقول ماخترناش اسمنا ولا  ميعاد ميلادنا ولا اهلنا
 بس  ما احنا  اللى  اختارنا  لقبنا بين الناس واصحابنا ولا ايه ياعمنا
 الا نسان مخير ازاى يتعامل مع الاشياء اللى ماخترهاش
حاجات كتير ماخترنهاش
بس اختارنا  طريقه التعامل معها 
تبقى حياتنا احرار فيها
ولا  حياتنا مش احرار فيها  
سؤالنا  النهارده  الانساان مخير ولا مسير  من وجهه نظرك
قول رايك   مع ذكر الاسباب التى بسببها كان اختيارك  

الاثنين، 9 مايو، 2011

عجبى


عجبى لما الرجال
 يبقوا فى ساعه الجد عيال
يتخانقوا زى الاطفال
وكانهم مش دارينين بالحال
بلد  بتتحول من نظام لنظام
وفيها بعض الفوضى ولسه متظبطلهاش نظام
ومساجين  بتفر من سجنها  وبتعمل فوضى وبتخترق النظام
ودول شويه عيال رايحين يتخانقوا ولا فى بالهم اى نظام
عجبى
هى ديه بلدهم ولا بلد غيرهم
زمان لما كانوا بيستعبطوا كانوا يقولوا الاستعباط  سببه النظام
ودلوقتى بيستعبطوا  ويقولوا الاستعباط سببه  فلول النظام
عجبى
امتى هيفوقوا  ويبداوا يصلحوا
ولا خلاص مافيش امل فيهم خلاص  فسدوا  
عجبى
 مش هنقعد نعيد ونزيد ونتكلم عن الوحده الوطنيه تانى
حفظنا ومش فاهمين ايه فايده الكلام تانى
ياترى هيجى اليوم نفهم ونعقل ولا هنفضل مساطيل
نقول كلام فى الصبح يطير  ونفتكر اننا كنا مساطيل
شريط بيسف ويرجع تانى
حدوته بتنتهى وترجع تانى
عجبى
يامصر يامحروسه
عيالك شكلهم مش عايزينك تكونى محروسه
عجبى
اشتروا الحريه ونسيوا الكتالوج
وقاعدين يلعبوا فى الريموت ونسيوا ان الحريه لها كتالوج
عجبى
طالبوا الحريه وسبوها  للبلطجه وبقيت فوضى
من امتى كانت الحريه فوضى
عجبى
ربنا يحرسك يامصر ياحره يامحروسه
من عيالك ويوقف رجالتك ضد عيالك  لاجل يحافظوا عليكى محروسه يامحروسه
وعجبى

الجمعة، 29 أبريل، 2011


عندما ينقطع النور وترى العيون الظلام 
اترى القلوب النور بالبصيره  ام انها تغرق هى الاخرى فى الظلام
النظر للكون بيدركك الايمان بالله  حتى لو تلاعب  بك  عقلك  ووصلك عقلك للالحاد
الاديان اجزاء كتيره منها غيبيات  قد يتلاعب بها الفكر الفاسد ويوصل الانسان للالحاد
ارزقنى يارب الفكر والقلب   الصالح
  واحمنى من فساد الفكر و القلب فهما بدايه الطريق الطالح
واحمنى من هوى النفس التى قد يتلاعب  ويفسد الفكر والقلب
ف بفساد القلب  يفسد الفكر  وبفساد الفكر يفسد القلب   
يارب  اجعل  صلاح قلبى  حارس لصلاح فكرى 
واجعل صلاح فكرى حارس لصلاح قلبى
واحمنى من شر نفسى ومن شر الاخرين

الثلاثاء، 19 أبريل، 2011

الى صديقى العزيز

صديقى
ماذا حدث لك ولماذا
كنا اصدقاء ومازلنا
ولكنى اخاف ان يكون اتى وقت الفراق فلقد اختلافنا
اصبحت لى صديق سوء
وماكنت زمان صديق  سوء
ماذا حدث اخبرنى
وماذا تغير من الظروف عرفنى
اصبحت اخاف منك لتفسدنى  
واخاف ابعد عنك تسوء اكتر
واكون قد تركت وانت تحتاجنى
وما معنى الصداقه اذا لم يصلح الصديق من صديقه
ماذا افعل  معك لترجع عن ما انت فيه
اضربك ليس ليا الحق فى  ان اضربك
وانت لست صغيرا لكى اضربك
ابعد الكبر ننحدر ونخيب  ونحن لم نخب صغارا
ارجع لصوابك فلم  نعد صغارا
صديقى
ارجع كماعرفتك فى الماضى ياعزيزى

الاثنين، 18 أبريل، 2011

ياطير مالك فين جناحيك
اتقصص ريشك ولا بيقيت عاجز عن الطير
دنيا زمان كان  بيتشتكى من شده  الهوى
دلوقتى جاى يطير فهوى
دنيا وقلابه والاحوال بتغير
من طير بيطير  لكتكوت متحير
يهوى الطير لكن مايعرف  يطير
سبحانه ساعات يرغب الناس فى شئ
وتكون مصالحهم فى شى
ويتحيروا بين الشئ والشئ
يمكن اللى عايزينه مايكنش لسه اتى ميعاده
وكل حاحه ليها ميعاد ومعموله بحساب
ويرزقنا الرازق الرزق  بميعاد وبحساب
بنتولد بميعاد وبحساب وبنترزق بميعاد وحساب
وبنموت بميعاد وحساب 
حتى بعد الموت بنتحاسب بميعاد وبحساب     
سبحانه لكل شئ  ميعاد وحساب

الاثنين، 4 أبريل، 2011

مجنون

باعترف انا مجنون
وارفض اكون عاقل فى زمن المجانين
بقولها من صغرى  متخرج من اكثر من مستشفى للمجانين
مجنون  زى الكون لما يثور    زلال براكين
يمكن يكون بيهد نفسه بس فى الاخر علشان يكون
يتتغير من حاله الى حاله  ليستعد يكون فى احسن حاله
 يتحول من قاع بحر الى مقطم
و يموت جواه  سمك وسمك يتلطم
ودا سر الحياه   طول عمرنا  جوانا حاجات بتعيش وحاجات بتموت 
زيها زينا بنعيش ونموت
شغل  جولوجيا    او حاله فوبيا
انا مجنون  مبسوط بجنانى
 حتى لو من جنانى بعانى
انا مجنون

الأحد، 9 يناير، 2011

Just a case

اولا  انا معرفش انجليزى كويس   بس هى خاطره  جت كدا بالانجليزى معرفش فى ايه  وبالتالى اى خطا فى grammar   دا شئ عادى جدا  وطبعا اى خطا فى write   شئ عادى جدا جدا     وطبعا بردوا  اى خطاء فى اى مجال فى اى كلمه   شئ  طبيعى جدا جدا  وانشاء الله مش هتكرر     معلش بعتذرلكم مقدما   



 I want say something about me
But I want you don't listen me
I don't know why
Maybe I want  scream  in the desert
Or Scream   with myself
But in any  case
I want scream without any one  listen me
Why 
 i don't know
Just a case 

السبت، 1 يناير، 2011

منهم لله


منهم لله بداؤا  السنه الجديده بالنار
ووجعوا  قلوبنا  وزرعوا فيها المرار
ناس  ماعندهمش لا دين ولا مله
عايزين يعملوا فتنه
بكره  نارهم تحرقهم
زيهم زى غيرهم
اللى حاولوا  يعملوا  فتنه  قبلهم 
ودم  ضحايا كنيسه القديسين بالاسكندريه
مش هيعمل فتنه
 لانه مش هيروح ببلاش
  ماهو الموضوع دا مش المفروض يعدى كدا ببلاش
لازم وقفه قويه ضد الارهاب
منهم لله   دول مش بنى ادمين دول شويه  كلاب
منهم لله
   


 

عام سعيد عليكم happy new year 2011