الخميس، 14 أكتوبر، 2010

ازاى هنحقق الحلم العربى

ازاى هنحقق الحلم العربى
وسط  الشجار العربى
  انا شايف شباب طالع
الانتماء العربى من قلبه طالع
عينه اتفتحت  على اهانه العرب للشعب المصرى
واتولد جواه  للعرب  كره  حصرى 
 فمن عليهم   وقال يا ما ساعدناهم  زمان
  وهما دلوقتى  مافيش اى امتنان
نسى ان اللى ساعدهم  زمان
ساعدوه  بردوه زمان
لما كان  فى بينا حب  الكل استفاد
اتساعده وساعده  والكل  استفاد
مين استخدم سلاح البترول فى الحرب
بس الكلام ده لما كنا بجد عرب   
وشايف خليجى بتاع كباريهات
راح كباريه  وقال ديه بلد كباريهات
طب ما اخوه خليجى  فاضل
راح  صلى فى جامع وقال ده شعب فاضل
 وشايف عراقى شاف جيش امريكانى
عبر  ووصله  عن طريق بلاد عربى
بيسئل نفسه  هى بلدنا مش بلد عربى 
وفلسطينى سامع عربى بيقول له  انتم بعته الارض
سئل نفسه كام  عربى احتل قبل كده كان  بايع  الارض  
وفى ماتش كوره  بين شعبين عرب
بلطجه   وقله ادب  ضحكوا علينا الغرب
ومصرى  صغير يغلط فى الشهداء ويجرح شهيد عربى
وجزائرى صغير  يغلط فى مصر ويكره كل مصرى
 بقى  هو ده الحلم العربى
ان يكون موجود بينا  دايما الشجار العربى
ونشجب وندين  فى جامعه الدول العربيه
هات توك توك خربت العربيه 
وكل طفل  عربى
بيشيل فى قلبه كره لكل عربى
وكل بلد تسب التانيه  والحكايه بقيت   مهانه
وتترد الاهانه  بالاهانه
 والانتماء الى العالم العربى  بقيت  اهانه
سامع  عيل بيقول العرب جرب
شاطر يا واد ضحك علينا الغرب
ازاى يتحقق الحلم العربى
وسط الشجار العربى
طول ما بينا الشجار العربى
سيظل الحلم العربى
الوهم العربى
مش مهم مين صح فينا  ومين غلطان 
المهم نحقق الحلم اللى بنتمناه 
نتجمع ونكون   وحده انسان  

هناك 17 تعليقًا:

Tears يقول...

لما نحقق الانتماء لنفسنا و بلادنا و نظامنا الاول و ده مش ح يحصل غير لما يكون فيه عدل و ديمقراطية و كرامة الاول

mrmr يقول...

انا رائ من راى تيريز
الله ينور عليكى يا تيريز

تحياتى ليك يا عمرو

بوست حلو

محمود(باحث عن حب) يقول...

لما يكون لينا
كرامه فى بلدنا
الناس هتعمل لينا كرامه بره بلدنا
ششوفت اللى حصل
لبنت جامعه الازهر فى الزقازيق
من ظابط الامن
حسبنا الله ونعم الوكيل
حاجه تخنق
http://www.facebook.com/video/video.php?v=1298845851216

ياريت تشوف الفيديو ده

خواطري مع الحياة يقول...

الســـــلام عليكــــــم
صباح الخير
اولا انا متشائمة من العرب هم ليه دائما ضد بعض
مفيش دوله عربيه هتوقف مع دوله شقيقة لها او محتاجة مساعده
والدليل فلسطين ولا دوله عربية واقفة جمبيها
لما راحت سفينة الحرية لفلسطين عشان تديها المؤن وضربتها اسرائيل العرب عملوا ايه اتكلموا شوية وخلاص طبقوا على الموضوع نسوه اصلا
خايفين من اسرائيل وامريكا وبريطانية هتحاسبهم
ده كله من وراء الرئاساء العرب يلا نفسي يلا شعبي
ربنا يرحمنا ويرحم العرب كلهم
تقبل مروري
سلامي.

karmen يقول...

انا رأي ان كل واحد لازم يصلح علاقته بربنا سبحانه وتعالي وبينه وبين نفسه
بعد كده هيكون عنده اراده وعزيمة
nice post amr
best wishes
¥k¥

dr_ahmedcupping@yahoo.com يقول...

السلام عليكم ورحمة الله وبركاته
***************************
الحجامة الرياضية أول مدونة تهتم بعلم الحجامة وتطبيقاته في المجال الرياضي كعلاج للإصابات الرياضية ، وتسريع استعادة الشفاء ، وفعالية التأهيل ، وكمنشط للآداء البدني . د . أحمد حلمي صالح Sports Cupping the first sports blog concerned with the knowledge of Cupping theray and its applications in the field of sports as a treatment for sports injuries, and speed up the restoration of healing, and the effectiveness of rehabilitation, and a booster for physical performance. Dr.Ahmed Helmy Saleh

Noha Saleh يقول...

لما نبطل نتخانق على الكورة ونشوف الاهم من ده كله
ولما نبطل نمسك لبعض على الواحدة
ولما نخاف على بعض بجد
هنقدر ساعتها نحقق الحلم العربى

عمرو يسرى يقول...

ا/ تيريز
اجابه صحيحه
بس كده يبقى مش هنلحق نشوف الحلم حقيقه يارب احفادنا يلحقه يشوفوه
نورتينى

عمرو يسرى يقول...

ا/ مرمر
اجابه صحيحه
بس كده محضر غش هههههههه
اوعى تزعلى بهزر
شكرا على كلامك الجميل
نورتينى

عمرو يسرى يقول...

ا/ محمود
اجابه نموذجيه وصحيحه
وبالنسبه للفديوه شفته وشوفت حاجات كتير زيه
من ايام عماد الكبير اللى ربنا فتح عليه بعدها وبقى بلطجى كبير الى حد خالد سعيد الله يرحمه
نورتنى

عمرو يسرى يقول...

ا/ رشا
كلامك صحيح
كل االعرب كده بما فيهم مصر ايضا
نورتينى

عمرو يسرى يقول...

karmen
كلام جميل بس هيبقى عنده اراده وعزيمه يعمل ايه بيها بعد ذلك
شكرا على كلامك الجميل
نورتينى

عمرو يسرى يقول...

dr_ahmedcupping@yahoo.com

برغم انى كنت ادبى بس ان شاء الله هتابعك
شرفتنى بزيارتك

عمرو يسرى يقول...

ا/ نهى صالح
اجابه صحيحه
نورتينى

عمرو يسرى يقول...

الى الان وصلنا اننا ممكن نحقق الحلم العربى عندما يكون لينا كرامه فى بلدنا وننتمى لتفسنا فالناس تحترمنا فى الخارج
وكمان لما نبطل نتخانق على الكوره ونبطل نقف لبعض على الواحده
وكمان لم نصلح علاقتنا بربنا ويكون عندنا اراده وعزيمه عشان نعمل كل ده
وب كده اقدر اقولكم اننى
انضممت الى صوت الاستاذه رشا
و فقد الامل فى الحلم العربى او على الاقل مشاهدته وانا حى

عمرو يسرى يقول...

شكرا لكم جميعا

mimo2050 يقول...

الحريه لكل المدونين الاول الانتماء للمحيط الاكبر هو جزء لايتجزاء من انتماءنا لوطنا