الأحد، 31 أكتوبر، 2010

مقلب حب

كل ما اشوفك
وعنيا بتيجى فى عنيك
يحمر وجهك وتنظر للارض
وانا من طبعى اخجل وانظر للارض
 ونرجع  تانى  نبص لبعض
ويدور حوا ر العيون بينا وبين بعض
واقرب تبعد
وتقرب وانا ابعد
وانتظر مره  ينزل علينا  المطر
 ماهو كل قصه حب فى الافلام بتبقى ساعه المطر
والارض بتنبت  رزقها بنزول المطر
 ودايما عايز اقولك فى كل مره جمله عارف انك عارفها
بس دايما حاسس انك بتهرب منها
اقولها  لا ماقولهاشى
عارفاها  لا معرفاهاشى
متهيئلى حاسه بيا من زمان
وانك  عارف عايز اقولك ايه كمان
اقولها لا ماقولهاشى
عارفاها لا ماعرفهاشى
 كل مقابله  حاسس ان  هينزل علينا  المطر
ماهو كل قصه حب فى الافلام كانت تحت المطر
والارض بنبت رزقها  بعد المطر
اقولها  لا  ماقولهاشى
عارفاها لا ماعرفهاشى
خلاص بقى لازم اقولها
خلاص الكلمه على لسانى ولازم اقولها
ب ب  ب  ب ب ب ب ب ب ب ب
ايوه اقول ب  ايه  
ب ب ب ب
 ها اقول  متردد ليه

ب ب ب ب ب ب ب ب ب ب ب ب

ب ب ب ب ب ب ب ب ب ب
بينفع تسلفينى 3 جنيه  
ايوه كده اقولها بتح  ايه  

السبت، 30 أكتوبر، 2010

عمليه نصب عن قصه حقيقه

فى يوم  قلت ادور فى الجرائد واكون متفائل
على شغل اصلى مش هفضل كدا عاطل
لقيت اعلان بيقول دار صحافه  عايزه محاسبين ومواهب صحفيه
قلت اهى تنفع لو مانفعتش فى محاسبه اجرب فى المواهب الصحفيه
قمت اتصلت بالنمره وانا معرفش انها عليا نمره
رديت عليا واحده  وقالت جمله واحده
العنوان 22 شارع عبد الخالق ثروت 
قولت ادعيلنا  ياعم ثروث
ورحت على العنوان لقيت يافطه مكتوب عليها باللون الاحمر  دار الحياه 
قولت شكلها هتبقى بدايه للحياه
طلعت قابلت واحده قالتلى خد استماره  بعشره جنيه
 قلت ايه عمليه النصب ديه
بس فى ناس تقولك عشان الجديه
وكنت خلاص همشى  بس قلت ادفع وخليك بيس
ليقول عليك مستخسر عشره جنيه او  مالكش فى الشغل وعيل سيس
قمت دافع وقلت اشوف الموضوع لاخره
ومليت الاستماره من غير اماره
لاقيتها قالت لى رشحناك  لشركه  فى مدينه نصر فوق بنك بركليز
قلت اما عمليه نصب وشغل خسيس
الاعلان بيقول  انهم طالبين  مش موردين للشركه اللى فوق بركليز
قلت اغلس واطلب حقى اللى كان مكتوب على الاستماره ام عشره جنيه
اصل كان مكتوب ثمن الاستمار كتاب هديه و عدد من الجريده
اصل ماحدش بيقراء هذه الجريده
فقالولى كتاب مافيش  وعندك اعداد بره خد منها اى جريده
هاهاهاها باعو العدد ابو جنيه بعشره
خرجت وقولت اشوف ايه اخرت اللعبه
طلعت على عنوان الشركه اللى فوق بركليز
واكتشف باقى اللعبه والشغل الخسيس 
سالت هناك   بعد المقابله ايه علاقتكم بدار الحياه
قالوا ولا حاجه احنا عملنا اعلان فى جريده  الوسيط   فاتصلت بينا واحده
من  جريده دار الحياه
وقالت  هنبعتلكم  واحد
قولنا لهم احنا عاملين اعلان فى الوسيط  واللى عايز يجى يجى بنقابل اى حد
هاهاها اما جريده بتلعب على الوشين
والغريب على صفحاتها بتقول انها بتوفر  شريك الحياه ووظائف مجانا طبعا ماهى بتلعب على الوشين
 طب  مافيش مره  تكسف على وش من الوشين
ومستغربتش بعدها لما  قراءت ان فى دار صحافه طالبه مواهب صحفيه و مهندسين
   زى ماكنت هى طالبه مواهب صحفيه ومحاسبين
عمليه نصب وافعال خسيسه 
من ناس خسيسه

الاثنين، 25 أكتوبر، 2010

الدكاتره والطلبه من ذكريات ايام الجامعه

كتبت هذه الخاطره   فى المدرج ايام الجامعه كنت ساعتها مخنوق من دكتور جلال بتاع المحاسبه  ودكتور  عبد المنعم  بتاع الاقتصاد  ودكتور ودكتور اللى الفاظهم   جعلتنى اشعر با ننى  فى غرزه وليس فى جامعه    وتذكرت من يعيب على الطلاب  فكتبت على لسانه هذه الكلمات   اتمنى  تعجبكم

 
مريت على المدارس والجامعات مره
لقيت ناس  كتير سالت واحد منهم هما فين الطلبه
رد عليا وقالى احنا الطلبه
كررت السوال هما فين الطلبه
رد عليا وقال احنا الطلبه
وقالى مندهش ليه قولتله  لو انتم طلبه
يبقى احنا ماكناش طلبه
انا مش شايف ايه طلبه
قالى اطلع المدرج لو لقيت دكتور هتلاقى طلبه
استغربت من الرد وطلعت المدرج لاول مره
فات نص ساعه وشويه وسالت احد الطلبه 
هى امتى هتبدا المحاضره
قالى لما  الدكتور يحن علينا ويدخل زى كل مره
سالته هو مافيش مواعيد للمحاضره
قالى لو  على مواعيد المحاضره
يبقى انت من نصف ساعه وشويه فى المحاضره
وسئلنى وهو بيضحك  انت اول مره تحضر محاضره
قلت معلش اصلى كنت منضبت  بمواعيد المحاضره
وشويه دخل الدكتور وبدات المحاضره
وسمعت كلام والفاظ لم اسمع بها فى الشارع  سمعتها فى المحاضره
وانتهت المحاضره 
وخرجت للشارع مذهول من المحاضره   
لقيت خناقه فى الشارع وسمعت الفاظ كانت  بالنسبه للمحاضره كانت محترمه
قربت منها  اهدى واسلك قولتلهم  يا اخونا خليتو  ايه للدكاتره  بتوع الجامعه
يا اخونا  احنا فى الشارع مش فى محاضره
روحت البيت وقلت اتغيرت المناهج ماكنتش ديه مناهجنا بالمره

الأحد، 24 أكتوبر، 2010

الخروج من التابوت (مع الاعتذار للدكتور مصطفى محمود )

ساخرج من التابوت
حتى لو على عصى صغيره هكون مسنود
وهطلع  النبوت
وهلعب معاكى يا دنيا  لعبه التحطيم
و اى مصاعب  بالامل   هلاعبها  لعبه التحطيم
هكون انا الغالب
و مش هتكون هى عليا  الغالب
ومش على الزمن هعاتب
همشى على الارض وادوس
ومش  هغرق فى  احزانى والوص
وهتنفس حتى لو الهوا ملوث مش نظيف
شعيرات انفى  ستجعله  نظيف
هجرى  وهكسر السدود  
ومش هتقف امامى اى  حدود
  هعيش الحياه عيشه   حى
عشان لما اموت افضل مع الناس حى
ساخرج من التابوت
وهطلع  النبوت

الخميس، 21 أكتوبر، 2010

على مر السنين

على مر السنين  بنتكون ونتلون  وبنضج  
يمكن بنفتكر اننا بنتغير لما بنتشكل وبنضج 
يمكن بنتوه  عن روحنا
ونفتكر ان احنا  مش احنا
ونبحث عن روحنا جوانا نلاقى فراغ
ونحس ان حاياتنا مجرد فراغ
ونقول على الطيبه سذاجه
لما نعيش حياتنا بسذاجه
دايما فى خط فاصل  بين الطيبه والسذاجه
 عمر السذاجه ما كانت طيبه
ولاعمر الطيبه ما تكون سذاجه
الطيبه يعنى لما تكون قادر تاخد حقك تسامح
الطيبه يعنى لما تكون قوى تسامح
الطيبه عمرها ما كانت ضعف اوتغفيل
الطيبه يعنى تكون قوى وتاخد حق باللين

الثلاثاء، 19 أكتوبر، 2010

روبابيكيا ( مستوحاه من بوست للاستاذه ستيته )

انا مش رايق اشترى  من حد احزانه اللى بقيت  روبابيكيا
انا عايز اللى يشترى منى  احزانى الروبابيكيا
مافيش حد عايز يبيع ابتسامه قديمه  او ذكرى حلوه روباييكيا
اى ذكرى حلوه  او ابتسامه قديمه   تبعدنا عن مودنا الحزين
وتفكرنا باى ذكرى حلوه ترفع حالتنا  المعنويه وتبعدنا عن مودنا  الحزين
هو ليه كل واحد  بيبعلنا  احزانه الروبابيكيا ويزود علينا الجو الحزين
لو فاكرنا فرحانين  ما يسبنا فرحانين
  ولا لازم يتحفنا  ويكسبنا  جوه الحزين
وقال يعنى احنا كنا فرحانين 
 دا كل  واحد بقى   قلبه بيتنفس  جو حزين
والجو العام بقى جو حزين 
ربنا يسعد  الفرحانين
ويبعد عنهم الجو الحزين
بس يبعولنا  اى  ابتسامه قديمه  او ذكرى حلوه   تكسر المود الحزين
واحنا اى ابتسامه قديمه  نازلين لها  شاريين
 روبابيكيا

الاثنين، 18 أكتوبر، 2010

عاش فى قبره

بعد ما ماتت  عنده  المشاعر 
  بقي عنده  تعبير واحده على وجهه  لكل  المشاعر
ابتسامه مجرد ابتسامه بلا معنى
لحياه بلا معنى
 واصبح صوره متحركه  من غير مشاعر
موجوده الصور مش موجوده  مش فارق ولا حد شاعر 
يتكلموا  الناس بلسانه  وكأنه مجرد صوره
وهو  ساكت  يمكن يكون تعود السكوت
ويمكن يكون اخرس بلا صوت
 ويمكن  يكون كان  فعلا صوره
صوره بخطين سود لواحد ميت  لسه فيه الروح
بيتحرك زى قطع الشطرنج ما كان ما نوديه يروح
 عايش ميت من سنين
وتعدى  عليه السنين
ويصغر قبره  
من الدنيا الواسعه
 الى متر فى متر
خلاص بقى يا دوب على حجمه
  مات  الميت
وبقى ميت ميت
 والحكايه انه عاش ميت
ومات  وهو اصلا ميت
وعجبى 

الأحد، 17 أكتوبر، 2010

حكايه شاب

حكايه شاب يسئلوه الناس انت فرحان ولاحزين
يرد جوه  نفسه ما عرفش  ان كنت  فرحان  ولاحزين
مافكترش ولا حد يفتكر  ان فى حاجه جامده  كنت بسببها حزين
وشعرت ساعتها انى انسان حزين
ولا افتكر انا انى كنت  فى يوم فرحان
وبالرغم ان فى حاجات كتيير فى حياته  فى  نظر الناس تفرح عمره ماكان فرحان 
يمكن يكون احساس وحيد شعر بيه
وهو اللامبالاه  وديه كارثه يابيه
ويسئله   دا شاب فرحان ولا شاب  حزين 
ساعات  يشوفوه عقل طفل فى  جسد العشرين
وساعات  قلب ميت فى جسد السبعين 
  وهو لا ده  ولا ده هو  يمكن  يكون فرحه  بقلب حزين  
يشوفوه بيعلب مع الاطفال يقولوا  انت كبرت مش لسه طفل
وهو عارف انه كبر مش لسه طفل
ويحللوه  ويقولوه  دا  يا ا ما   كان طفل مدلل يا اما كان  طفل حزين  
ويشوفوه انه  لاينفع كده ولاكده
ماهو لو  كان طفل مدلل  كان زهق ومل من التدليل وفى حياته ك شاب هيكون فى دليل
ودا مافيش اى  دليل  على اى تدليل
وازاى يكون طفل حزين  ودا كان طفل وسيم ولاحد شاف منه  دمعه والكل يشهد على قدرته على الابتسام
كان طفل غريب    بيشتكى  المه  وعلى وجهه ابتسامه
كذبوه  وشال جرحه فى قلبه  طبعا ماهو ازاى  بيتالم وعلى وجهه ابتسامه
غلطان ما اتعلمش من صغره  قبل ما يشتكى يبص فى مرايه
و لا  من صغره  علم  ملامحه  انها  تدل على جرحه
ويسئلوه لما كبر ليه كلامك  حزين  غريبه بيسئلوه عن الكلام  بالرغم ان ملامحه  لسه عليها  ابتسامه
 كذبوه  وهو طفل ايام البراءه  بس هو كان  غلطان كانت وخداه البلاهه  وراسم  على وجهه ابتسامه 
وكذبوه  لما كبر بالرغم من الابتسامه  
كذبوا  كلامه وهو صغير بسبب  الابتسامه 
ولما كبر كذبوا الابتسامه   
 عجبى

قراطيس قراطيس

قراطيس  قراطيس 
وانت اللى معينهم يا  رئيس
فى كل موقف  ينكشفوا انهم قراطيس
وتطلع انت الحكيم الرئيس
 طب لما تبقى رئيس
 وتعيين  شويه قراطيس
دا مش للمال  اهدار
ولا انت عشقت الانحدار
 قراطيس  قراطيس
وانت  اللى معينهم يا رئيس
ربنا يستر

السبت، 16 أكتوبر، 2010

اعلنت الاكتئاب

اعلنت الاكتئاب
بعد الحلم  ما بقى سراب
حاولت اتفائل ثانيه
قالولى  عندك هوسه
افتكروا انى على راسى ريشه
ومش حاسس بالعيشه
اعلنت الاكتئاب
عاتبونى  وقالولى ليه الاكتئاب
  قال يعنى ماعندهمش  اكتئاب
دا الجو العام بيساعد على الاكتئاب
حتى البوست بتاعى سميته اعلنت الاكتئاب
 وانا  اعلنت الاكتئاب
ومش عايز عتاب
الا لو  من واحد متفائل لسه ما عندوش   اكتئاب
عشان افكره بكلامه  لما  يبقى  عنده حاله اكتئاب
ما الجو العام  يجيب الاكتئاب
وكلام الناس عن الهم   يجيب الاكتئاب
من اول ........ الى ............  يجيب الاكتئاب
وانا  اعلنت الاكتئاب  
ههههههههههههههه
ضحكه واحد عنده اكتئاب

الخميس، 14 أكتوبر، 2010

ازاى هنحقق الحلم العربى

ازاى هنحقق الحلم العربى
وسط  الشجار العربى
  انا شايف شباب طالع
الانتماء العربى من قلبه طالع
عينه اتفتحت  على اهانه العرب للشعب المصرى
واتولد جواه  للعرب  كره  حصرى 
 فمن عليهم   وقال يا ما ساعدناهم  زمان
  وهما دلوقتى  مافيش اى امتنان
نسى ان اللى ساعدهم  زمان
ساعدوه  بردوه زمان
لما كان  فى بينا حب  الكل استفاد
اتساعده وساعده  والكل  استفاد
مين استخدم سلاح البترول فى الحرب
بس الكلام ده لما كنا بجد عرب   
وشايف خليجى بتاع كباريهات
راح كباريه  وقال ديه بلد كباريهات
طب ما اخوه خليجى  فاضل
راح  صلى فى جامع وقال ده شعب فاضل
 وشايف عراقى شاف جيش امريكانى
عبر  ووصله  عن طريق بلاد عربى
بيسئل نفسه  هى بلدنا مش بلد عربى 
وفلسطينى سامع عربى بيقول له  انتم بعته الارض
سئل نفسه كام  عربى احتل قبل كده كان  بايع  الارض  
وفى ماتش كوره  بين شعبين عرب
بلطجه   وقله ادب  ضحكوا علينا الغرب
ومصرى  صغير يغلط فى الشهداء ويجرح شهيد عربى
وجزائرى صغير  يغلط فى مصر ويكره كل مصرى
 بقى  هو ده الحلم العربى
ان يكون موجود بينا  دايما الشجار العربى
ونشجب وندين  فى جامعه الدول العربيه
هات توك توك خربت العربيه 
وكل طفل  عربى
بيشيل فى قلبه كره لكل عربى
وكل بلد تسب التانيه  والحكايه بقيت   مهانه
وتترد الاهانه  بالاهانه
 والانتماء الى العالم العربى  بقيت  اهانه
سامع  عيل بيقول العرب جرب
شاطر يا واد ضحك علينا الغرب
ازاى يتحقق الحلم العربى
وسط الشجار العربى
طول ما بينا الشجار العربى
سيظل الحلم العربى
الوهم العربى
مش مهم مين صح فينا  ومين غلطان 
المهم نحقق الحلم اللى بنتمناه 
نتجمع ونكون   وحده انسان  

الأربعاء، 13 أكتوبر، 2010

على الجبهه فى ماتش كوره

على الجبهه فى ماتش كوره رايحين بيشجعوا
هجوم  خط نص دفاع اهلى وزمالك بيلعبوا
وبداء ضرب النار  وفى زملكاوى ولعوا
على الجبهه فى ماتش كوره  رايحين بيشجعوا
هجوم خط نص دفاع  اهلى والاسماعيلى بيلعبوا
بداء تكسير الكراسى  وبيها بيحدفوا
على الحبهه فى ماتش سله   رايحون بيشجعوا
هجوم خط نص  دفاع اهلى  والاتحاد بيلعبوا
بداء الهجوم وتكسير الكراسى وبيها بيحدفوا
على الجبهه فى ماتش كوره  رايحين بيشجعوا
 هجوم  خط نص  دفاع مصر والجزائر  بيلعبوا
سكاكاين  ومطاوى وبالطوب يحدفوا
على الجبهه فى ماتش كوره رايحين بيشجعوا
 هجوم خط نص دفاع اهلى وترجى  بيلعبوا 
فى الامن  قاعدين بيضربوا
على الجبهه فى ماتش كوره  رايحين يشجعوا
هجوم خط نص  دفاع  وبالخناق راح يكلموا
فى استاد رياضى  احنا ولا  فى معركه
  مشجعين   فى بعض عاملين يطحنوا
وياريت من تشجيعهم  كانوا بيكسبوا
على الجبهه فى ماتش كوره رايحين يطحنوا
وبعد ما يموت نصهم  يفتكروا انهم كانوا بيشجعوا
على الجبهه فى ماتش كوره  رايحين يقتلوا
هجوم  خط نص دفاع  ولروح الرياضه بيدفنوا
الكره والحماقه  للقلب اتسللوا
وبداء الاعتداء  والكل حصل على ضربات جزاء
ونار الغل  كانت عاليه معرفش حد يصدها
جت من ركنيه هايله   خليت  الرياضه  تنهار 
 والاستاد  اصبح دمار
 على الجبهه فى ماتش كوره قال رايحين يشجعوا
شماريخ  وسكاكين وتكسير كراسى  وطوب  وشكلهم جايين يخربوا
زاد الشجار ولاحد بقى متابع اللعب  وكأنهم مش جاييين يشجعوا
واللعيبه بتلعب  وبردوا  محدش متابع  وقاعديين  يخربوا
على الجبهه فى ماتش كوره   للروح الرياضه بيودعوا


تشجيع ده ولا دمار
عشق للكوره ده  ولا عشق  للبلطجه  والدمار  

الاثنين، 11 أكتوبر، 2010

حوار رئاسى شعبى ديمقراطى

انا الرئيس  انا الرئيس  وانتم بتقوله مش عايزيين توريث
كلنا بنحب اولادنا يكونوا احسن مننا  وانا الرئيس
  انا الرئيس فى احسن من كده  اعتقد  ما مفيش 
     بس احنا شعب لايورث ومش بنحب التوريث
خلاص انتخبوا اى حد يكون رئيس  غير الوريث
بس يكون ينفع  ان  يكون رئيس
هو فى غير الوريث ابن الرئيس  ينفع يكون  رئيس
 متربى فى بيت الرئيس  فاهم الحوار هو خلاص هيبقى الرئيس
هاهاهاها اما شعب مهاييس   مش بتقوله مش عاييزين توريث
ومش عاجبكم  انى  انا الرئيس
دلوقتى بتقوله عايزين الوريث يبقى الرئيس
 ما هو متربى فى بيت الرئيس
شوفتم  ازاى انتم  معجبين بيا  رئيس
ما  انت خلتنا  مش شايفين حد ينفع غير الوريث  يكون رئيس
خايف اكون انا عنيكم  وانا مش دارى
كام مليون  منكم  اعمى  وانا مش  واخد بالى
انت  حطيت على عيوننا غمام
مش شايفين حد جدع همام
يا اللى بتقول الكلام دا  حتى لو على عنيك غمام
ليه مش حاسس نفسك جدع همام
ليه بتحلمش تكون رئيس 
وانا كنت ايه يعنى غير مجرد انسان
 ولا انت مش انسان
يعنى كنت تسمحلى
وانت جربت يعنى
ماغيرى جرب
واتبهدل واتسجن  وفى بلده اتغرب
 يعنى انت زى غيرك
يعنى هكون احسن منهم
ليه لا
لا اظن  ذلك
تبقى الحكايه مش حكايه  غمام
الحكايه انك انسان  خايف جبان
  والموضوع مش ذنبى  اشمعنى غير ماكنش جبان
 ما انا  بردوه خفت لما شفت غيرى  كمان
فطلعت انا انسان جبان
و حضرتك  كملت رئيس
موضوع مش ذنبى  وانا  الرئيس
 وكلامك ده كلام تهييس


ربنا يستر

الأحد، 10 أكتوبر، 2010

احنا مش لبعض

انا مصدق انك اتغيرت  ومين فينا ما بيتغيرش
انا كمان اتغيرت  بقولهالك  لو لسه ما تعرفش
و زى  ما زمان  ما كناش لبعض
دلوقتى بردوا احنا مش لبعض
اتغيرت عشانى  عشان ترجع ليا
وانا اتغيرت من افعالك فيا
 احنا يا دوب لعبنا  لعبه الكراسى
وزى  ما انا خد مكانك  يمكن تكون خد مكانى
اتغيرنا وممكن اتغيرت مشاعرنا
لكن  رغم تغيرنا ثبت حالنا
يمكن لو رجعتلك
اردلك جرحك
وانا بعد ما ذوقت  طعم الجرح
صعب عليا اجرح
ومادام فى القرب جرح 
وفى البعد جرح
يبقى افضل  جرح البعاد  
 عن القرب اللى نتمنى فيه البعاد
ويبقى احنا مش لبعض
جاى تقولى انك اتغيرت ويلا نرجع لبعض
مين قالك انى كنت واهب حياتى مستنيك تتغير ونرجع تانى لبعض
سيبك من شغل الافلام ده اصله كلام حكايات
يرجع الحبيب اللى فجاه اختفى  ويشده الحنين
 ويرجع ندمان  ويتسامح وكأن الفراق معملش فى قلب  حبيبه اهات
انما الواقع  حاجه تانيه
ما فيش  قصه حب ترجع فى ثانيه
اتغيرنا  مااتغيرناش
زى زمان ماكناش لبعض
النهارده احنا مش لبعض